Transkript zu den Audiodateien

Audio Nr. 1:

Zwoi Ritemer:

d Josef:            Jo, Sepha bisch du heit wäh, abr i mui, obarum sei des Häß a klei b’schnodde!

Siasch au reat iblseahnig us.

d Sepha:          Und du bisch a wiaschda kähla Kog!

d Josef:            Ane, dur doch it glei so gschpäßig, i ho mi doch bloß vrleatzmulet.

Audio Nr. 2:

Beim Großbur, dem falsche Siache,

hanget allat dr Nuschdr usem Hosesack,

er holtschet umanond

und git reat a vor deana

kluine Bibbehislar.

Audio Nr. 3:

„Isch doch des a Krotteschinder!“,

mulet d’Muattr vor si na,

wenns Meassr gar it haue will.

Audio Nr. 4:

„B’schidde sott ma au no nuss dua,

s’Lachalo isch voll!“

Audio Nr. 5:

D Muattr stoht am Förggar u wäscht s Gschier.

Nochar weret i dem Wassr

d Kind d Fieß gwäsche.

Audio Nr. 6:

Isre Grumbra sind im Kär.

Vor mas siedet,

wäscht bas duss

am Golggar.

Audio Nr. 7:

Im Summr hot ma s Veah

z’Nacht dussa,

ma seit, ma dei hofe.

Dr Buseler derf no it nus,

der suft erscht a Mill.

Im Verschlag sind a baar Färle,

dr Bohle striecht au umanand,

i glaub der isch vrdwieret.

Audio Nr. 8:

Dr Vaddr isch uf m Bolledäre,

ma ka au Obrratte sage,

und sucht d’Huize zämet.

Audio Nr. 9:

Deidda huckt z Obet vorm Hus,

moddet an sim lange Kolbe

und hot an reada Huigarte

mit Nochbrs Ratschkattla.

Audio Nr. 10:

Dr Vaddr mudderet am Disch:

„Was hosch denn heit fir an Häfelar?“

Und d Muattr seit:

„Was bisch scho wieder so adeer?“

Audio Nr. 11:

Isr uis muaß ufs Leibele

nea‘ b m Suschtall

und bei der Glegahoit

muaß ma au no Pfläddr

vu de Kia razieh.

Audio Nr. 12:

S klui Marile huckt im Eck

und isch reat dreißig,

weil se de Notschl it kriet.

Audio Nr. 13:

„Die gwieene Bäderle

hebsch abr all uf!“

Audio Nr. 14:

Bei is hot im Gade

d Großmuadder und

d Großvadder gschlofa.

Audio Nr. 15:

Gerscht z Obet hots

an gherige Hurnigler ghett,

die gonz Buind isch hi.

Herbscht und ’s Raschle vum Laub

Von Michael Lehmann

Des hond mir as Kind doch so gern dong,
im Herbschtluft an seal baschtlete
Drache schtiege long.

D’ Sunne schint vum Himml ra,
und as isch sche vorduss.
D’ Bäm sind gmolt i vielna Farbe.
Fir’s Aug isch des an Gnuss.

Hi und da, do fliagt a Blatt
im Zickzack uf de Bode ra.
Und glei no deam au no a anders,
des wo sich numm vrhebe ka.

Wenn du schtill bisch, kasch es höre,
wia’n’as raschlet an am Zwieg,
und wenn as nochhar abefallt,
witr dunda  uf ar Bieg.

Zmol do blost a klui de Oschnar,
und schu schneit as taused ra.
Und die wirblet, und dia fallet,
dass di Aug numm folge ka.

Blatt um Blatt deckt untrem Bom,
no und no etz ’s Gras ganz zua.
Und du kriasch, wenn du do dur gohsch,
vu deam Raschle gar it gnua.

Dia Pracht, dia duret gar it lang,
bloß a paar Schtunda, no isch as us.
D‘ Sunne, dia goht au bald untr,
und mit ’em Warmsi isch go Schluss.

De Neabl kutt vum Dobl ruf.
’s Liacht isch au vrschloffe.
Und du kasch uf d’ Sunne
am nächschte Dag bloß hoffe.